Sabirabad rayonunda gənc qəfil vəfat edib.
Unikal.аz xəbər verir ki, rayon sakini, 1993-cü il təvəllüdlü Dəyanət Şıxəliyev qəflətən dünyasını dəyişib. Onun ürəktutmasından öldüyü bildirilir.
Qeyd edək ki, mərhum 2014-cü ildə böyük qəhrəmanlığı ilə yadda qalmışdı. Belə ki, 2014-cü ildə Sabirabad şəhərini Cavad kəndi ilə birləşdirən, yeni istifadəyə verilmiş körpüdən 1957-ci il təvəllüdlü, Cavad kənd sakini, Əhliman Hüseynov ona məxsus "VAZ 2107" markalı maşınla Kür çayına düşüb. Maşındakı qonşusunun qızı, 9 yaşlı Hüseynova Güldəstəni xilas edərək özü suda batıb.
Hadisə şahidlərinin sözlərinə görə, Əhliman yaxşı üzə bilsə də, Güldəstəni maşından çıxararaq xilas etmək üçün çox əziyyət çəkib. Əhliman qışqırmağa başlayıb ki, "Kömək edin, daha taqətim tükənir". Bunu eşidənlər maşınlarını saxlayaraq Kür aşağı sahillə ona tərəf qaçmağa başlayıblar. Qaçanlar arasında Türkədi kənd sakini Dəyanət də olub. Dəyanət qızı xilas edən Əhlimanın bərabərinə çatdıqda heç kimə qulaq asmadan suya atılıb və onlara tərəf üzməyə başlayıb. Dəyanətin onlara yetişməsinə 2-3 metr qalmış Əhliman qızı ona tərəf itələyərək batıb. Dəyanət isə uşağı xilas etməyi bacarıb.
