Lənkəran rayonunun Boladi kəndi ərazisində Ulum çayının sahili məişət tullantıları ilə çirkləndirilib.
Cenublu.az-ın əldə etdiyi məlumata görə, bəzi vətəndaşlar tullantıları avtomobillərlə, əsasən də gecə saatlarında çay sahilinə gətirərək əraziyə atırlar. Nəticədə burada antisanitar vəziyyət yaranıb, ətraf mühit və çayın ekoloji vəziyyəti təhlükə altına düşüb.
Xüsusilə qarşıdan gələn qış aylarında vəziyyətin daha da ağırlaşacağı ehtimal olunur. Yağışlı havalarda Ulum çayında suyun səviyyəsinin yüksəlməsi, bəzən isə qısamüddətli sel hadisələrinin baş verməsi sahilə atılan tullantıların yuyularaq Xəzər dənizinə daşınmasına səbəb ola bilər.
Yaxınlıqda yaşayan sakinlər aidiyyəti qurumlardan ərazinin təcili təmizlənməsini, çay sahilinə nəzarətin gücləndirilməsini və bu cür halların qarşısının alınmasını tələb edirlər.
