SON XƏBƏRLƏR

Bəlbay kəndi Astara şəhərindən 36 km şimal-qərbdə, Vəşəru çayının sahilində, Peştəsər dağ silsiləsinin ətəyində yerləşir [1,3]. Yaşayış məntəqəsi yerli əhali tərəfindən “Balbo”, “Balbau” və ya “Balbou” kimi adlandırılır [3].

Alim Budaq Budaqovun yazdığına əsasən, kəndin adı talış dilində “kiçik qardaş” mənasını daşıyır [5]. Yazıçı Musarza Mirzəyevin fikrinə əsaslanaraq demək olar ki, kəndin bu cür adlandırılması Balabəy adlı şəxslə bağlıdır [4].

Güman olunur ki, yaşayış məntəqəsinin adı buradakı əhalinin balıqçılıqla məşğul olması ilə bağlı yaranıb. Kəndin adı ilə oxşar təlləffüz olunan və balıqçılar tərəfindən istifadə edilən balbır – suya batmamaq üçün tora bağlanan taxtalara deyilir [3].

Əhali, əsasən, əkinçilik və heyvandarlıqla məşğuldur [1]. 2009-cu ilin statistik göstəricilərinə əsasən, bu kənddə 227 nəfər yaşayıb [2].

Ədəbiyyat:

  1. Azərbaycan milli ensiklopediyası. III cild. Bakı-2011.
  2. Azərbaycan Respublikası əhalisinin siyahıyaalınması 2009-cu il. I cild. Bakı-2010.
  3. Azərbaycan toponimlərinin ensiklopedik lüğəti. I cild. Bakı-2007.
  4. Musarza Mirzəyev. Talış toponimlərinin qısa izahlı lüğəti. Bakı-1993.
  5. Budaq Budaqov, Nadir Məmmədov. Azərbaycan Lənkəran regionu toponimlərinin izahlı lüğəti. Bakı-2008.