Azərbaycan Dillər Universitetinin (ADU) kollektivi Biləsuvar rayonuna səfər edib.
Universitetdən AZƏRTAC-a bildirilib ki, səfər çərçivəsində rayon rəhbərliyi ilə görüşlər keçirilib, təhsil və mədəniyyət sahələrində əməkdaşlığın inkişafına dair müzakirələr aparılıb, həmçinin bir sıra əhəmiyyətli tədbirlər təşkil olunub.
Səfər proqramı çərçivəsində ADU kollektivi əvvəlcə Ümummilli Lider Heydər Əliyevin abidəsini ziyarət edərək önünə gül dəstələri qoyub, Ulu Öndərin əziz xatirəsini ehtiramla yad edib. Daha sonra ADU-nun rektoru, akademik Kamal Abdulla Biləsuvar Rayon İcra Hakimiyyətinin başçısı Faiq Qürbətovla görüşüb. Görüş zamanı rayonda təhsilin inkişafı, gənclərin intellektual potensialının artırılması, eləcə də Azərbaycan Dillər Universiteti ilə Milli Qəhrəman Mübariz İbrahimov adına Biləsuvar Təhsil Kompleksi arasında həyata keçirilən əməkdaşlıq layihələri ətrafında fikir mübadiləsi aparılıb.
Səfər çərçivəsində Biləsuvar Təhsil Kompleksində 1 İyun - Uşaqların Beynəlxalq Müdafiəsi Gününə həsr olunmuş tədbir keçirilib. Tədbirdə Çin Xalq Respublikasının Azərbaycandakı səfiri Lu Mey, ADU-nun əməkdaşları, Təhsil Kompleksinin rəhbərliyi, müəllim-şagird kollektivi və valideynlər iştirak ediblər. Çıxış edənlər uşaqların hərtərəfli inkişafı, onların hüquqlarının qorunması və beynəlxalq əməkdaşlığın təhsil sahəsinə verdiyi töhfələrdən bəhs ediblər. Tədbir şagirdlərin təqdim etdiyi rəngarəng bədii proqramla davam edib.
Həmin gün Təhsil Kompleksində ADU-nun təşəbbüsü ilə yaradılan Konfutsi Mərkəzinin rəsmi açılış mərasimi baş tutub. Açılış mərasimində çıxış edən akademik Kamal Abdulla bildirib ki, mərkəz şagirdlərin Çin dilini öyrənməsi ilə yanaşı, onların Çin xalqının zəngin tarixi, mədəniyyəti və milli dəyərləri ilə yaxından tanış olmalarına imkan yaradacaq. Rektor humanitar əlaqələrin inkişafı məqsədilə Çində Azərbaycan dili və Mədəniyyəti Mərkəzinin yaradılması təklifini də irəli sürüb. Çin Xalq Respublikasının Azərbaycandakı səfiri Lu Mey bu təşəbbüsü yüksək qiymətləndirərək iki ölkə arasında təhsil və mədəni əməkdaşlığın daha da genişlənməsinə dəstək verməyə hazır olduqlarını bildirib.
Səfər çərçivəsində akademik Kamal Abdulla Biləsuvar rayon ictimaiyyətinin nümayəndələri ilə görüş keçirib. Görüşdə rektor "Azərbaycan dilinin saflığının qorunması" mövzusunda çıxış edərək ana dilinin milli kimliyin və mənəvi dəyərlərimizin əsas daşıyıcılarından biri olduğunu vurğulayıb. O, Azərbaycan dilinin zənginliyinin qorunmasının, dil normalarına riayət edilməsinin və gənc nəslin ana dilinə hörmət ruhunda yetişdirilməsinin vacibliyindən danışıb. Görüş zamanı dil mədəniyyətinin inkişafı, ədəbi dil normalarının təbliği və Azərbaycan dilinin gələcək nəsillərə saf şəkildə ötürülməsi ilə bağlı geniş fikir mübadiləsi aparılıb.
Səfərin sonunda tərəflər arasında qarşılıqlı xatirə hədiyyələri təqdim olunub, əməkdaşlıq perspektivləri müzakirə edilib və qarşılıqlı əlaqələrin daha da genişləndirilməsi istiqamətində fikir birliyi nümayiş etdirilib.
