Xüsusi amansızlıqla qəsdən adam öldürmədə təqsirləndirilən Semur Məmmədquliyevin işi üzrə kassasiya şikayəti verilib. Şikayət Ali Məhkəmədə hakim Rəşad Abdulovun sədrliyi ilə araşdırılacaq.
İttihama görə, hadisə 2024-cü il oktyabrın 27-də Biləsuvar rayonunda, məcburi köçkünlər üçün salınmış 3 saylı qəsəbədə baş verib. Semur Məmmədquliyev əvvəlcədən tanıdığı Şahin Şahverdiyevin "WhatsApp" vasitəsilə özünün və ailə üzvlərinin ünvanına təhqiramiz mesajlar göndərdiyini, həmçinin bacısını dəfələrlə narahat etdiyini əsas gətirərək ondan qisas almaq qərarına gəlib.
Hadisə günü o, Şahin Şahverdiyevə qəfil hücum edib, boğazını sıxaraq yerə yıxıb və təxminən 40 dəqiqə ərzində yumruq, təpik və baş zərbələri ilə döyüb. Daha sonra zərərçəkmişin başını bir neçə dəfə yerə çırpıb, ardınca taxta parçası ilə çoxsaylı zərbələr endirərək onu qəsdən öldürüb.
Lənkəran Ağır Cinayətlər Məhkəməsi Semur Məmmədquliyevə 14 il 6 ay həbs cəzası verib. Lakin Şirvan Apellyasiya Məhkəməsi dövlət ittihamçısının protestini və zərərçəkmiş tərəfin şikayətini qismən təmin edərək cəzanı 16 ilə qaldırıb.
Qeyd edək ki, təqsirləndirilən şəxsin anası Cəmilə Vəliyevanın sözlərinə görə, Şahin Şahverdiyev qızına elçi göndərib rədd cavabı aldıqdan sonra ailəyə qarşı nalayiq hərəkətlər edib və sonradan bu hadisə baş verib.
