Cəlilabadda "TikTok"da tanış olduğu 15 yaşlı qızla cinsi münasibətdə olan kişiyə 1 il həbs verilib.
Cenublu.az xəbər verir ki, hadisə rayonun Göytəpə kəndində baş verib.
Məhkəmədə ifadə verən təqsirləndirilən Elçin (ad şərtidir) bildirib ki, 2025-ci ilin sentyabr ayında 2010-cu il təvəllüdlü zərərçəkmiş Sevda (ad şərtidir) "TikTok" vasitəsilə ona yazaraq tanış olmaq istədiyini deyib. Bir müddət sosial şəbəkədə yazışıblar. Onun sözlərinə görə, oktyabrın əvvəlində Sevda özü onunla görüşmək istədiyini bildirib. Onlar bir neçə dəfə Elçinin kirayələdiyi evdə görüşüb, cinsi münasibətdə olublar.
Elçin bildirib ki, sonradan Sevdanın anası onunla əlaqə saxlayaraq qızının adının çıxdığını və ona sahiblənməli olduğunu deyib. Bundan sonra o, Cəlilabadın Uzuntəpə kəndində kirayə ev tutaraq Sevdanı həmin evə aparıb. Orada birlikdə qaldıqları müddətdə aralarında yenidən cinsi münasibət yaranıb. O, məhkəmədə törətdiyi əmələ görə peşman olduğunu bildirib.
Zərərçəkmiş şəxs məhkəmədə verdiyi ifadəsində bildirib ki, 2025-ci ilin sentyabr ayında sosial şəbəkə vasitəsilə təqsirləndirilən şəxsə özü yazıb və tanış olmaq istədiyini deyib. O qeyd edib ki, həmin ilin oktyabrın 9-da Elçinin çağırışı ilə onun avtomobilinə əyləşərək Cəlilabad rayonunun Uzuntəpə kəndində kirayə tutulmuş evə gedib. Burada təqsirləndirilən şəxs ona artıq onun ailəsi olduğunu bildirib və bir müddət sonra aralarında cinsi münasibət baş verib. Bir neçə gün birlikdə qaldıqdan sonra zərərçəkmiş şəxs evə qayıdıb və baş verənlər barədə anasına məlumat verib. Daha sonra Cəlilabad Rayon Polis Şöbəsinə müraciət edilib. Zərərçəkmiş şəxs hazırda təqsirləndirilən şəxslə barışdığını, ona qarşı heç bir şikayət və tələbinin olmadığını bildirib.
Cəlilabad Rayon Məhkəməsinin hökmünə əsasən, Elçin Cinayət Məcəlləsinin 152.1-ci maddəsi ilə təqsirli bilinərək 1 il müddətinə azadlıqdan məhrumetmə cəzasına məhkum edilib.
Fidan İlqar
