Biləsuvar rayonunda 41 yaşlı kişi həyat yoldaşına şiddət göstərdiyi üçün məhkəmə qarşısına çıxıb.
Hadisə rayonun kəndlərindən birində baş verib. Fəridlə həyat yoldaşı Zöhrə arasında mübahisəyə səbəb kişinin "TikTok"da canlı yayım zamanı tanımadığı bir qadınla oyun oynaması olub. Qadın buna etiraz etdikdən sonra tərəflər arasında mübahisə yaranıb.
İstintaq zamanı Fərid bildirib ki, həmin gün qaynı və əmisi oğlu ilə canlı yayım açıb, sonradan tanımadığı bir qadın da yayıma qoşulub. Yayım bitəndən sonra həyat yoldaşı qadınla əlaqəsinin olub-olmadığını soruşub. Fərid isə onu tanımadığını desə də, Zöhrə buna inanmayıb və mübahisə başlayıb.
Təqsirləndirilən şəxsin sözlərinə görə, mübahisə zamanı həyat yoldaşını itələyib, nəticədə qadının başı qapıya dəyib. Daha sonra yenidən qarşıdurma yaşanarkən qadının baş nahiyəsinə dirsəyi ilə zərbə vurduğunu etiraf edib.
Zərərçəkmiş Zöhrə isə ifadəsində bildirib ki, Fərid son illər spirtli içki səbəbindən onunla tez-tez mübahisə edib. Hadisə günü də içki qəbul etdikdən sonra aralarında mübahisə yaranıb və Fərid onun baş və boyun nahiyələrinə yumruq zərbələri endirib.
Biləsuvar Rayon Məhkəməsinin hökmü ilə Fərid 1 il müddətinə islah işləri cəzasına məhkum edilib.
