Astaranın Pensər kəndində yerləşən "Şəhram" şadlıq sarayının həyətində dava məhkəmə ilə bitib.
Rayon sakini, 1982-ci il təvəllüdlü Zaur həmkəndlisi Valehlə şəxsi münasibətlər zəminində mübahisə edib. Mübahisə zamanı Zaur Valehin üz və burun nahiyəsinə kəllə zərbəsi vuraraq ona müxtəlif dərəcəli xəsarətlər yetirib.
Hadisə ilə bağlı Zaura Cinayət Məcəlləsinin 128-ci – qəsdən sağlamlığa zərər vurma maddəsi ilə ittiham elan olunub.
Məhkəmədə ifadə verən Zaur özünü təqsirli bildiyini, əməlindən peşman olduğunu deyib. O, həmçinin zərərçəkmiş şəxslə barışdıqlarını və vurduğu ziyanı tam ödədiyini bildirib.
Astara Rayon Məhkəməsində aparılan araşdırma zamanı tərəflərin barışması nəzərə alınıb. Nəticədə Zaur barəsində aparılan cinayət təqibinə xitam verilib və o, cinayət məsuliyyətindən azad olunub.
Qeyd edək ki, adlar şərtidir.
