Lənkəran Ağır Cinayətlər Məhkəməsində qəsdən adam öldürməyə cəhd ittihamı ilə mühakimə olunan 2008-ci il təvəllüdlü Kənan Abuzərli 5 il 7 ay 15 gün azadlıqdan məhrum edilib.
İş materiallarına görə, 2025-ci il avqustun 18-də Kənanın bacısı ailədaxili mübahisədən sonra Biləsuvarın Nərimankənd kəndindəki evini tərk edərək ata evinə gəlib. Bacısının ağlaması və yanında olan azyaşlı övladının narahat vəziyyətdə olması Kənanı qəzəbləndirib. O, baş verənlərə görə bacısının qayınatası Azər Babayevi günahkar sayaraq ondan qisas almağa qərar verib.
Kənan gecə evdən mətbəx bıçağı götürərək Azər Babayevin yaşadığı evə gedib, hasardan aşaraq həyətə daxil olub və təxminən 15-20 dəqiqə gizlənərək onu gözləyib. Azər Babayev həyətə çıxanda əvvəlcə onunla danışmağa çalışıb, bacısının ailəsinin niyə dağıldığını soruşub. Tərəflər arasında qısa mübahisə yaranıb və Kənan bıçaqla ona ardıcıl zərbələr endirib.
Nəticədə zərərçəkən həyat üçün təhlükəli ağır xəsarətlər alıb. Cinayət niyyətinin başa çatmasına isə Azər Babayevin müqaviməti və hadisə yerinə gələn oğlunun müdaxiləsi mane olub. Oğlu Kənanı zərərsizləşdirib, yaralı isə xəstəxanaya çatdırılaraq xilas edilib.
Məhkəmədə Kənan ittihamı qismən qəbul edib. O bildirib ki, Azər Babayevə bacısının ailəsinin dağılmasının səbəbini soruşanda aqressiv cavab alıb və əsəbiləşərək bıçaqdan istifadə edib. Təqsirləndirilən şəxs onu öldürmək istəmədiyini, sadəcə qorxutmaq niyyətində olduğunu iddia edib.
