Masallıda istixanalarda yetişdirilən çiyələyin yığımına başlanılıb.
Fermerlərin Cenublu.az -a verdiyi məlumata görə, mövsümün əvvəlində məhsulun qiyməti onları qismən qane etsə də, son günlər bazarda ciddi ucuzlaşma müşahidə olunur. Hazırda çiyələk həm paytaxt, həm də region bazarlarına göndərilir.
Təsərrüfat sahiblərinin sözlərinə görə, bir müddət əvvəl çiyələyin kiloqramı 6-7 manata satılırdı. İndi isə qiymət 1 manat 50 qəpikdən başlayaraq 3 manata qədər dəyişir.
Qeyd olunur ki, çiyələk digər kənd təsərrüfatı məhsulları ilə müqayisədə daha çox xərc tələb edir. Dərman, gübrə, işçi qüvvəsi və digər xərclərin artdığı bildirilir. Onların sözlərinə görə, qiymətlərin aşağı düşməsi çəkilən xərcləri qarşılamağa imkan vermir.
Fermerlər hesab edirlər ki, bazardakı ucuzlaşmaya havaların qeyri-sabit keçməsi, məhsul bolluğu və soyuducu anbarlarda saxlanılan çiyələklərin satışa çıxarılması təsir göstərir. Onlar bildirirlər ki, vəziyyət bu cür davam edərsə, gələcək illərdə çiyələk sahələrinin azalması mümkündür.
Qeyd edək ki, 2026-cı ildə Masallı rayonunda 376,4 hektar sahədə çiyələk əkilib.
