20–26 may tarixlərində Şamaxı Olimpiya İdman Kompleksində keçirilən boks üzrə kadetlər arasında zona birinciliyinin final mərhələsində Masallı rayonunun gənc idmançıları uğurlu çıxışları ilə diqqət çəkiblər.
Cenublu.az xəbər verir ki, Lənkəran-Astara Regional Gənclər və İdman İdarəsi nəzdində fəaliyyət göstərən Masallı Rayon Uşaq-Gənclər İdman Məktəbinin yetirməsi Yusif Nəsirov 38 kiloqram çəki dərəcəsində bütün rəqiblərinə qalib gələrək qızıl medal qazanıb. Gənc boksçu həmçinin yarışın "Ən yaxşı idmançısı" adına layiq görülüb.
Masallının digər təmsilçiləri də yarışda uğurlu nəticələr əldə ediblər. Hüseyn Rəhimli 40 kiloqram çəki dərəcəsində gümüş medal qazanıb. Kənan Şükürov isə 70 kiloqram çəki dərəcəsində fəxri ikinci yerə sahib olub.
Bundan başqa, idmançıların hazırlığında xüsusi əməyi olan məşqçi Orxan Cəbiyev "İlin ən yaxşı məşqçi-müəllimi" adına layiq görülüb.
Qeyd edək ki, Masallı boks məktəbinin bu uğuru rayon idmanının inkişafının və gənc istedadların yetişdirilməsinin növbəti göstəricisi kimi qiymətləndirilir.
