Lerik rayonundan olan idmançı Avropa birinciliyinin qalibi olub. Bu haqda məlumatı Cenublu.az bu gün, 19 iyun tarixində verir.
Yunanıstanın Saloniki şəhərində 15 və 17 yaşadək yeniyetmələr arasında ağırlıqqaldırma üzrə çempionat keçirilib. 73 kq çəki dərəcəsində çıxış edən idmançımız İsa Əliyev birdən qaldırma hərəkətində 112 kq-ı ram edib və bu hərəkətdə qızıl medal qazanıb. Təkanla qaldırmada o, 137 kq-ı başı üzərinə qaldırıb və gümüş medala sahib çıxıb. Toplam 249 kq (112+137) nəticə göstərən təmsilçimiz yekun sıralamada da bütün rəqiblərini qabaqlayıb və fəxri kürsünün ən yüksək pilləsinə qalxıb.
