Noyabrın 5-i günün ikinci yarısından başlayaraq Azərbaycanın şimal və qərb rayonlarında hava şəraitinin qeyri-sabit keçəcəyi, fasilələrlə yağıntı yağacağı gözlənilir.
Cenublu.az xəbər verir ki, bu barədə Milli Hidrometeorologiya Xidməti məlumat yayıb.
Bildirilib ki, bəzi yerlərdə yağıntılar leysan xarakterli və intensiv olacaq, şimşək çaxacaq, dolu düşəcək. Dağlıq ərazilərdə isə qar yağacağı ehtimal olunur. Noyabrın 5-i axşam və 6-sı gecə yağıntıların bir qədər güclənəcəyi gözlənilir.
Bununla əlaqədar çaylarda sululuğun artacağı, Böyük Qafqazın və Lənkəran-Astara bölgəsinin bəzi çaylarından qısamüddətli daşqın və sel keçəcəyi istisna edilmir.
Qeyd olunub ki, ölkə ərazisində qeyri-sabit hava şəraiti noyabrın 9-u axşamadək davam edəcək. Havanın temperaturu isə əvvəlki günlərlə müqayisədə tədricən 5-10 dərəcə enəcək.
