Lerik rayonunda yeznəsini döyərək ağır xəsarət yetirməkdə təqsirləndirilən Yusif Dövlətovun cəzası yüngülləşdirilib. O, həbsdən azad edilərək şərti cəzaya məhkum olunub.
İttihama görə, hadisə 2025-ci il oktyabrın 28-də Lerik rayonunun Vılık kəndində baş verib. Astara şəhərindəki toy mərasimindən qayıdan Yusif Dövlətov məktəbin həyətində həmkəndlisi və yeznəsi Bəşir İbadovla qarşılaşıb. İşlədikləri məktəbdə iş saatı ilə bağlı aralarında mübahisə yaranıb. Bu zaman Dövlətov əvvəlcə İbadova yumruqla zərbələr endirib, daha sonra məktəbin həyətindəki yanğınsöndürmə belini götürərək bədəninin müxtəlif nahiyələrinə vurub.
Nəticədə Bəşir İbadovun baş nahiyəsində ağır, həyatı üçün təhlükəli xəsarətlər yaranıb. Məhkəmə-tibbi ekspertizası xəsarətləri sağlamlığa ağır zərər vurma kimi qiymətləndirib.
Lənkəran Ağır Cinayətlər Məhkəməsinin hökmü ilə Yusif Dövlətov 3 il müddətinə azadlıqdan məhrum edilib. O, apellyasiya şikayətində zərərçəkmiş şəxslə barışdığını, himayəsində azyaşlı uşağının olduğunu və qarşı tərəfin ondan şikayətçi olmadığını bildirib.
Şirvan Apellyasiya Məhkəməsi onun şikayətini təmin edərək Lənkəran Ağır Cinayətlər Məhkəməsinin hökmünü dəyişdirib. Dövlətov barəsində seçilmiş həbs qətimkan tədbiri ləğv olunub və o, Umbakı Penitensiar Kompleksindən dərhal azad edilib.
Mənbə: pravda.аz
