Layə Əhmədova 1914-cü ildə Masallının Mahmudavar kəndində anadan olub, ilk ibtidai təhsilini də həmin kənddə aldıqdan sonra Lənkəran Pedaqoji Məktəbinə daxil olub. Oranı əlaçı şagird kimi 1933-cü ildə bitirib və elə həmin tədris ilindən Masallı rayonunun Çayqıraq kəndində işə başlayıb. O dönəmlər parta olmadığı üçün şagirdlər həsir üzərində əyləşir və bu formada dərs keçirilirdi.
Layə Əhmədova Masallı rayonu Bədəlan və Türkoba kənd məktəblərində də çalışmışdı. Layə müəllimənin Türkoba məktəbindən olan şagirdləri yüksək elmi dərəcələrə yiyələniblər. Nümunə kimi akademik Bahadır Tağıyev, dosent Qulamhüseyn Əliyevi göstərmək olar.
1940-cı ildən 1998-ci ilə kimi doğma kəndində müəllimə kimi çalışıb. Mahmudavar kəndində də elm sahəsində yüksək nailiyyətlər əldə etmiş şagirdləri kifayət qədər olub. Elmlər doktorları Mehman Ağayev, Rəfayıl Eyvazov, fəlsəfə doktorları Rahib Əliyev, Habil Fəttayev və.s şəxsləri nümunə kimi göstərmək olar.
Layə Əhmədovanın fəaliyyətləri yüksək qiymətləndirilib, "Qabaqcıl Maarif Xadimi" döş nişanı ilə təltif olunub. Həmçinin "Əmək igidliyinə görə" medalı, "Vladimir İliç Leninin anadan olmasının 100 illiyi ilə əlaqədar yubiley medalı", Stalin mükafatı və bir çox dövlət medalları, fəxri fərmanlar, mükafatlarla təltif olunub.
Layə müəllimə Masallı rayonunun ilk qadın müəllimlərindəndir. O, həmçinin Mahmudavar kəndinin ilk qadın müəlliməsidir.
Layə Əhmədova 2003-cü il oktyabrın 5-də vəfat edib.
