Son günlər ölkə ərazisində yağan intensiv və fasiləsiz yağışlar nəticəsində Kür çayında suyun səviyyəsi artıb. Bu artım xüsusilə çayın aşağı axınlarında – Salyan və Neftçala rayonlarında daha qabarıq hiss olunur.
Cenublu.az xəbər verir ki, son bir həftə ərzində Salyan ərazisində suyun səviyyəsi 2 metrdən çox yüksəlib və bu hal əvvəllər daşqınlarla üzləşmiş sakinlərdə narahatlıq yaradıb. Müşahidələrə görə, çayda suyun səviyyəsi demək olar, hər gün artmaqda davam edir.
Məlumata görə, suyun qalxması nəticəsində çayda əvvəllər görünən bəzi kiçik adacıqlar və ağaclar su altında qalıb. Mütəxəssislər bildirir ki, hazırkı vəziyyət hələlik ciddi təhlükə yaratmır.
Rəsmi qurumlar tərəfindən qeyd olunur ki, çayın səviyyəsi daim nəzarət altındadır və hər hansı fövqəladə vəziyyət qeydə alınmayıb. Hazırda çayda su sərfi saniyədə 500–700 kubmetr arasında dəyişir.
