Azərbaycanın Milli Qəhrəmanı, polis leytenantı, Birinci Qarabağ müharibəsi şəhidi Rövşən Abdullayevin doğum günüdür.
Rövşən Əbdülhüseyn oğlu Abdullayev 1969-cu il 16 yanvarda Lerik rayonunda anadan olub.
Orta təhsilini Astara şəhər 1 saylı orta məktəbdə başa vurduqdan sonra ailəsi ilə birlikdə Lənkərana köçüb.
Rövşən 1987-ci ildə Sankt-Peterburq Ali Hərbi-Siyasi məktəbinə daxil olur. 1991-ci ildə ali məktəbi əla qiymətlərlə bitirən gənc leytenantın təyinatını Rostov şəhər Daxili İşlər Şöbəsinə verirlər. O, Azərbaycana qayıdan kimi DİN-in əməkdaşı olaraq daxili qoşunların tərkibinə qatılır. Gənc zabit bir müddət sonra Zəngilana göndərilir. Rövşən 70 nəfərdən ibarət tağımın komandiri təyin edilir.
Rövşənin köməkliyi ilə düşmənin Qafan rayonunda yerləşən obyektləri məhv edilib. 13 sentyabr 1993-cü il Rövşənin son döyüşü oldu. Erməni faşistləri Zəngilan rayonunun Qazançı kəndinə hücum etmişdi. O, döyüş yoldaşları ilə “QAZ-66” markalı avtomobilə əyləşib Qazançıya yollanır, onlar kəndin yaxınlığında düşmənin PDM-i və piyadaları ilə üzbəüz çıxırlar, güclü atəşə məruz qalaraq ölüm-dirim savaşına girirlər. Rövşən yoldaşlarına meşəyə çəkilməyə əmr edir, özü ağır yaralansa da, silahı yerə qoymur. Yoldaşları onu xəstəxanaya çatdırsalar da, şəhid olur.
Azərbaycan Respublikası Prezidentinin fərmanı ilə 1995-ci ildə Rövşən Əbdülhüseyn oğlu Abdullayev ölümündən sonra "Azərbaycanın Milli Qəhrəmanı" adına layiq görülüb.
Lənkəran şəhər qəbiristanlığında dəfn edilib. Lənkəran şəhərində abidəsi qoyulub. Lerikdə isə adına mədəniyyət evi və küçə var.
