Çexiyalı investorlar utilizasiya zavodunun tikintisi ilə bağlı Lənkəranda olublar.
Cenublu.az Lənkəran Şəhər İcra Hakimiyyətinə istinadən xəbər verir ki, çexiyalı investorlar Jan Strunc, Soukup Dusan, Vaclav Vasicek və Marek Veleba məişət tullantılarının idarə olunması məsələləri ilə bağlı ŞİH-nin başçısının birinci müavini Mikayıl Cəfərzadə ilə görüşüblər.
Görüşdə “Azərbaycan Respublikasının 2022–2026-cı illərdə sosial-iqtisadi inkişaf Strategiyası”na uyğun olaraq yüksək keyfiyyətli ekoloji mühitin yaradılmasından ötrü tullantıların səmərəli idarə olunmasının önəminə diqqət çəkilib.
Xarici investorlar sözügedən məsələ ilə bağlı ötən il 2 dəfə ŞİH başçısı ilə görüşdüklərini və daha sonra mərkəzi icra hakimiyyəti orqanları ilə müvafiq müzakirələr apardıqlarını bildiriblər.
Təqdim olunan layihə təklifi ilə bağlı ilkin texniki-iqtisadi əsaslandırma parametrləri və layihənin icrası üçün tələb olunan digər müvafiq məlumatlar təqdim edilib və hazırda layihənin təsdiqi və icrası ilə bağlı son tamamlanma işləri aparılır.
