Cəlilabadın üzüm bağlarında yığım davam edir və qısa müddətdə 300 tona yaxın məhsul xarici bazarlara ixrac olunub.
Cənublu.az AZƏRTAC-a istinadən xəbər verir ki, bu il Cəlilabadın üzüm bağlarında məhsul boldur. Bağ sahibləri bir aya yaxındır məhsul yığımına başlayıblar. Cəlilabadda xarici növlər də becərilir və rayon üzrə 1410 hektar üzüm bağından 1375 hektarı bar verən sahələrdir. Fermer Mirhəbib Salmanlı bu il 15 hektar bağında bol məhsul əldə edib və ixrac üçün “Artika”, “Sultaniyyə” və “Prima” sortları seçilib.
[video width="1280" height="720" mp4="https://cenublu.az/storage/photos/2024/08/17240652621038457246.mp4"][/video]
Salmanlı məhsulların bağda çeşidlənərək yerli və xarici bazarlara qablaşdırıldığını qeyd edir. Daxili bazarda üzüm 50-70 qəpik, ixracda isə 90 qəpikdən 1 manat 10 qəpiyə qədər qiymətə satılır. Ümid edilir ki, ixrac artacaq və fermerlər yaxşı qazanc əldə edəcək. Hazırda 1500 ton məhsulun 300 tondan çoxu xaricə ixrac olunub. Üzüm bağlarının 170 hektarında yığım başa çatıb, orta məhsuldarlıq 120 sentnerdən artıqdır. Yığım davam edir.
