Ötən gün xəbər verdiyimiz kimi, Cəlilabad rayonunun Uzuntəpə yaşayış məntəqəsində artefaktlar aşkar edilmişdi.
Təsərrüfat işləri zamanı üzə çıxan maddi-mədəniyyət nümunələri Azərbaycan Dövlət Pedaqoji Universitetinin Cəlilabad filialının tələbəsi tərəfindən sözügedən universitetin muzeyinə təhvil verilmişdi.
AMEA-nın Arxeologiya, Etnoqrafiya və Antropologiya İnstitutunun aparıcı elmi işçisi, tarix üzrə fəlsəfə doktoru, dosent Anar Ağalarzadənin "Report"un yerli bürosuna verdiyi məlumata görə, tapıntılar eramızdan əvvəl VIII-VII əsrlərə, dəmir dövrünə aid Muğan arxeoloji mədəniyyətinə məxsus maddi mədəniyyət nümunələridir: "Bu maddi mədəniyyət tapıntılarının ilk nümunələri XX əsrin 30-cu illərində Bakı-Ələt-Astara dəmir yolu xətti çəkilərkən Cəlilabadın indiki Uzuntəpə kəndi ərazisində, Azərbaycanın tanınmış arxeoloqu İsa Cəfərzadə tərəfindən aşkar edilib. İlk dəfə elmə Muğan mədəniyyəti adı ilə daxil olunub. Hazırda tapıntılar aşkarlanan yerdə kompleks arxeoloji tədqiqat işlərinin aparılmasına ehtiyac var".
[URIS id=67130]
