Saatlı rayonunda gənc oğlan keçmiş sevgilisinin ailəsinə hücum edib.
Rayon sakini, 2002-ci il təvəllüdlü Xəyal bir müddət həmyerlisi olan gənc qızla sevgi münasibətində olub. Lakin sonradan aralarında mübahisə yaranıb və Xəyal qızı döyüb. Bundan sonra münasibətlər tamamilə bitib.
Bir neçə gün sonra Xəyal qızın kiçik bacısı ilə münasibət qurmağa cəhd edib. Bu məqsədlə yaxınlıqdakı məktəbə gedərək qızın bacısı ilə görüşüb və onunla sevgili olmaq istədiyini deyib. Kiçik bacı da ona rədd cavabı verəndə Xəyal qızı hədələyib.
Həmin gün axşam saatlarında o, evdən bıçaq götürərək keçmiş sevgilisinin nənəsinin evinə gedib, hasardan aşaraq həyətə daxil olub, daha sonra evin pəncərəsindən içəri keçib. O, ilk olaraq bıçaqla keçmiş sevgilisinin 72 yaşlı nənəsi Sara Ağayevaya hücum edib və başına, bədəninə zərbələr endirib. Qadın aldığı ağır xəsarətlərdən huşunu itirib.
Hadisəni evdə olan məktəbli nəvəsi görüb və qışqıraraq qonşuları köməyə çağırıb. Bu zaman Xəyal məktəbli qızı da döyüb və müxtəlif bədən xəsarətləri yetirib, daha sonra isə qaçıb.
Hadisə yerinə gələn polis əməkdaşları araşdırmalara başlayıb və keçirilən tədbirlər nəticəsində Xəyal saxlanılıb. Faktla bağlı cinayət işi başlanılıb və iş məhkəməyə göndərilib.
Saatlı Rayon Məhkəməsinin hökmü ilə Xəyal 2 il 3 ay müddətinə azadlıqdan məhrum edilib və məhkəmə zalında həbs olunub.
