Salyan rayonunda qonşusunu daşla vuraraq öldürməkdə təqsirləndirilən Elşən Səmədov hökmdən kassasiya şikayəti verib. O, cəzasının yüngülləşdirilməsini istəyir.
Hadisə 2024-cü il oktyabrın 19-da axşam saatlarında Salyan şəhəri Əlibəy Hüseynzadə küçəsində baş verib. İttihama görə, yüngül sərxoş vəziyyətdə olan Əziz Salayev qonşusu Elşənə yaxınlaşaraq aqressiv şəkildə siqaret istəyib. Elşən siqaretinin olmadığını deyəndə tərəflər arasında mübahisə yaranıb.
Bildirilir ki, Əziz mübahisə zamanı Elşəni və onun ailəsini söyüb. Bundan sonra onlar yaxınlıqdakı yarımtikilinin yanında dalaşıblar. Əziz Elşəni yerə yıxaraq zərbələr endirib. Qonşular onları ayırsa da, ayağa qalxan Elşən yerdən götürdüyü daşla Əzizin başına vurub.
Əziz Salayev aldığı xəsarətlərdən ölüb.
Lənkəran Ağır Cinayətlər Məhkəməsinin hökmü ilə Elşən Səmədov 9 il azadlıqdan məhrum edilib. O, əvvəl apellyasiya, indi isə kassasiya şikayəti ilə hökmün dəyişdirilməsinə nail olmağa çalışır. Şikayət Ali Məhkəmədə hakim Zaur Hüseynovun sədrliyi ilə araşdırılacaq.
