Ali Məhkəmədə Sabirabad Rayon Mərkəzi Xəstəxanasının Regional Perinatal Mərkəzində yenidoğulmuş uşağın ölümü ilə bağlı təqsirləndirilən həkim mama-ginekoloq Naibə Mahmudovanın kassasiya şikayətinə baxılıb.
Araşdırmalara görə, həkimlər Naibə Mahmudova və neonatoloq Gülnarə İmanova tərəfindən tibbi yardım tam həcmdə göstərilməyib. İttihama əsasən, ana Günay Ağayevaya düzgün diaqnoz qoyulmayıb, tibbi göstəriş olsa da, əməliyyat gecikdirilib. Həmçinin yenidoğulmuş uşağın vəziyyətinin düzgün qiymətləndirilməməsi və zəruri tibbi yardımın vaxtında göstərilməməsi nəticəsində körpənin öldüyü bildirilib.
Faktla bağlı Sabirabad rayon prokurorluğunda cinayət işi başlanıb.
Sabirabad Rayon Məhkəməsinin hökmü ilə Naibə Mahmudova 1 il həkimlik fəaliyyəti ilə məşğul olmaq hüququndan məhrum edilməklə 3 il müddətinə azadlığın məhdudlaşdırılması cəzası almışdı.
Daha sonra Şirvan Apellyasiya Məhkəməsi onun "vəzifə saxtakarlığı" maddəsi ilə bəraət almasına qərar verib, ittihamı isə "tibbi xidmət qaydalarını pozma" maddəsinə dəyişib. Nəticədə həkimə elektron qolbaq tətbiq olunmaqla 2 il azadlığın məhdudlaşdırılması cəzası verilmişdi.
Hakim İlkin Rəcəbovun sədrliyi ilə keçirilən iclasda qərar elan olunub. Qərara əsasən, Şirvan Apellyasiya Məhkəməsinin əvvəlki qərarı ləğv edilib və iş yenidən baxılması üçün apellyasiya instansiyasına qaytarılıb.
