Lənkəranda qadın həyat yoldaşını mübahisə zamanı bıçaqlayıb. Hadisə ailə münaqişəsi zəminində baş verib.
Şəhər sakini Şadil Məmmədov əvvəllər ailəli olan və dörd uşaq anası Aytənlə evlənib. Cütlüyün bu nikahdan da bir övladı dünyaya gəlib.
Bir müddət əvvəl Şadil işdən evə qayıdarkən Aytən ondan uşaq üçün yemək pulu istəyib. Şadil pulu olmadığını deyəndə tərəflər arasında mübahisə yaranıb. Aytən ərini qazandığı pulları əxlaqsız qadınlara xərcləməkdə ittiham edib. Mübahisə zamanı mətbəx bıçağını götürən qadın Şadili ayağından yaralayaraq hadisə yerindən qaçıb.
Polis əməkdaşlarının keçirdikləri əməliyyat tədbirləri nəticəsində Aytən saxlanılıb və iş məhkəməyə göndərilib.
Məhkəmədə məlum olub ki, qadın əvvəllər də ərini döyüb. Həmin vaxt Şadil həyat yoldaşını bağışladığı üçün cinayət işinə xitam verilib. Bu dəfə isə o, Aytəni bağışlamayıb və cəzalandırılmasını istəyib.
Məhkəmənin hökmü ilə Aytən 6 ay müddətinə azadlığın məhdudlaşdırılması cəzasına məhkum edilib.
Soyad şərtidir.
Mənbə: oxu.аz
