Bu gün Cəlilabaddan olan şəhid Təbriz İsabala oğlu İsayevin xatirəsi anılır.
Azərbaycan Ordusunun Xüsusi Təyinatlı Qüvvələrinin kiçik giziri Təbriz İsayev 1993-cü il martın 12-də Cəlilabad rayonunun Bəcirəvan kəndində anadan olub.
O, 2014-cü ildən etibarən Xüsusi Təyinatlı Qüvvələrin tərkibində gizir kimi xidmət etməyə başlayıb. 2016-cı il Aprel döyüşləri zamanı yaralanıb və müalicə aldıqdan sonra xidmətinə davam edib. 2020-ci ildə Vətən müharibəsində savaşıb. Təbriz bu döyüşlərdə yaralanaraq xəstəxanaya yerləşdirilib, lakin həkimlərə döyüşə qatılmaq istədiyini bildirib və öz ərizəsi ilə cəbhəyə qayıdıb. 2020-ci il 10 oktyabr tarixində Xocavənd istiqamətində, Hadrutun azadlığı uğrunda gedən döyüşlərdə qəhrəmancasına şəhid olub. Oktyabrın 13-ü isə torpağa tapşırılıb.
Ölümündən sonra "Vətən uğrunda", "İgidliyə görə", "Cəbrayılın azad olunmasına görə", "Kəlbəcərin azad olunmasına görə", "Xocavəndin azad olunmasına görə" medalları və "Azərbaycan Bayrağı" ordeni ilə təltif edilib.
