Astara rayonunun Şiyəkəran kənd sakini, 43 yaşlı Sadiq Əhmədov təxminən 5 ildir ki, yataq xəstəsidir. Onun sol əli və ayağı iflic olub, hərəkət edə bilmir. Bundan əlavə, baş nahiyəsində 18 santimetrlik şiş var və bu səbəbdən görmə və eşitmə qabiliyyətini də itirib. Bu vəziyyətdə olmasına baxmayaraq, əlilliklə bağlı pensiyası kəsilib.
Onun əmisi bildirib ki, hazırda ciddi sosial çətinliklərlə üzləşən Sadiq əmək qabiliyyətini itirdiyi üçün pensiya təminatı ilə bağlı aidiyyəti qurumlara bu ilin may ayında müraciət edilib. Müraciətdən təxminən 5 ay keçməsinə baxmayaraq, hələ də bir nəticə yoxdur.
Sadiq Əhmədovun vəziyyətini daha da ağırlaşdıran məqam isə onun tək yaşamasıdır. O, anasının vəfatından sonra tamamilə köməksiz qalıb.
Problemlə bağlı TƏBİB-dən bildirilib ki, əlilliyin qiymətləndirilməsi məqsədilə Sadiq Əhmədovun baş nahiyəsindəki sümük defektinin ölçüləri düzgün müəyyən edilmədiyinə görə vətəndaş təkrar rentgen müayinəsi və sümük defektinə uyğun kodun təyin edilməsi üçün Astara Rayon Mərkəzi Xəstəxanasına yönləndirilib.
Tibbi sənədlərdəki çatışmazlıqlar aradan qaldırıldıqdan sonra vətəndaşa Forma 88 rəsmiləşdirilib və sentyabrın 29-da Əlillik alt sisteminə daxil edilib.
Mənbə: Xəzər TV
