İmişli Rayon Ağsaqqallar Şurasının həbsdə olan sabiq sədri Saleh Səmədova hökm oxunub. O, 8 il müddətinə azadlıqdan məhrum edilib.
Bakı Ağır Cinayətlər Məhkəməsində keçirilən prosesdə müdafiə tərəfi vurulmuş 224 min manat ziyanın və 112 min manat dövlət rüsumunun tam ödənildiyini bildirərək cinayət işinə xitam verilməsini istəyib.
Dövlət ittihamçısı isə ziyanın ödənilməsinə baxmayaraq, Səmədovun cinayət məsuliyyətindən azad edilməməsini və 9 il həbs cəzasına məhkum olunmasını tələb edib.
Məhkəmə dəymiş ziyanın tam ödənilməsini nəzərə alsa da, cinayətin ağırlığına görə işə xitam verilməsini mümkün saymayıb.
Hökmə əsasən, Saleh Səmədov vəzifə səlahiyyətlərindən sui-istifadə etməklə külli miqdarda mənimsəmədə təqsirli bilinib. O, cəzasını ümumi rejimli cəzaçəkmə müəssisəsində çəkəcək. Cinayət məsuliyyətindən azad edilməsi üçün dövlət büdcəsinə ödədiyi 112 min manat isə özünə qaytarılacaq.
Qeyd edək ki, Saleh Səmədov 9 May tədbirində SSRİ bayrağı və Georgi lenti ilə çıxışından sonra ictimai qınaqla üzləşmiş, bir müddət sonra Dövlət Təhlükəsizliyi Xidməti tərəfindən həbs edilmişdi. Korrupsiyada ittiham olunan sabiq sədr 17 aydır həbsdə idi.
Mənbə: lent.аz
