Neftçalada 15 yaşlı yeniyetmənin öldüyü qəzaya görə sürücünün cəzası qüvvədə qalıb.
Şirvan Apellyasiya Məhkəməsi yol qəzası törətməkdə təqsirləndirilən Xalid Əsədovun apellyasiya şikayətini təmin etməyib.
İttihama görə, hadisə bu il yanvarın 24-də Neftçala-Salyan avtomobil yolunun Aşağı Surra kəndi ərazisində baş verib. Xalid Əsədov "Mercedes Sprinter" markalı avtomobillə Salyan istiqamətində hərəkətdə olarkən qarşı hərəkət zolağına çıxıb və Sabir Ələkbərovun idarə etdiyi "VAZ-2106" markalı maşınla toqquşub.
Qəza nəticəsində "VAZ-2106"da arxa oturacaqda əyləşən, 2011-ci il təvəllüdlü Murad Ələkbərov ağır xəsarətlər alıb. O, xəstəxanaya aparılarkən yolda dünyasını dəyişib.
Neftçala Rayon Məhkəməsi Xalid Əsədovu Cinayət Məcəlləsinin 263.2-ci maddəsi ilə təqsirli bilərək 5 il 1 ay müddətinə azadlıqdan məhrum edib. O, məhkəmə zalında həbs olunub. Şirvan Apellyasiya Məhkəməsi isə hökmü dəyişməyib.
Ad, soyad şərtidir.
Mənbə: pravda.аz
