Salyan şəhər sakini Əvəzağa Mustafayev 22 ildən artıq əmək stajı olmasına baxmayaraq, əmək pensiyası ala bilmədiyini iddia edir.
1957-ci ildə anadan olan Əvəzağa 1974-cü ildən əmək fəaliyyətinə başlayıb, müxtəlif illərdə xarrat, sürücü və traktorçu kimi çalışıb.
Onun sözlərinə görə, 2022-ci ildə pensiya üçün müraciət etsə də, əmək kitabçasında tarixlə bağlı uyğunsuzluq olduğu bildirilib və iş stajı pensiya hesablanarkən nəzərə alınmayıb.
Hazırda 220 manat sosial müavinət alan 69 yaşlı sakin altı dəfə infarkt keçirdiyini, aldığı pulun dərman xərclərini qarşılamağa çatmadığını deyir.
Əvəzağa Mustafayev aidiyyəti qurumlardan əmək stajının yenidən araşdırılmasını və pensiya hüququna baxılmasını xahiş edir.
