Lənkəranda 25 yaşlı oğlan həmkəndlisinə xəsarət yetirib. Hadisə ötən il mayın 13-də rayon kəndlərindən birində baş verib. 2001-ci il təvəllüdlü Fəqan axşam saatlarında evinin qarşısında olarkən əvvəldən aralarında narazılıq olan həmkəndlisi Vahidi görüb. İttihama görə, Vahid küçə ilə keçərkən onun yerişinə irad bildirib və aralarında mübahisə yaranıb. Mübahisə zamanı Fəqan yumruqla Vahidin burun və göz nahiyəsinə zərbələr vurub.
Məhkəmədə ifadə verən Fəqan özünü təqsirli bilməyib. O deyib ki, Vahidlə aralarındakı problem iki il əvvəl atasının mağazasında yaranıb. İddiasına görə, həmin vaxt Vahid atasını təhqir edib, məsələni polis araşdırıb və nəticədə atası 10 sutka inzibati həbs alıb. Bundan sonra münasibətləri tamamilə pozulub.
Fəqan ifadəsində Vahidin hadisə günü onun evinin qarşısından keçərkən "özünü "lotu" kimi yeridiyini və ona tərs baxdığını bildirib. O isə Vahidə "düzgün yeriməsini" deyib. Bundan sonra tərəflər arasında əlbəyaxa dava başlayıb. Fəqan bildirib ki, dava zamanı vurduğu yumruqlardan biri Vahidin göz nahiyəsinə dəyib. Daha sonra atası və qardaşı onları ayırıb.
Lənkəran Rayon Məhkəməsinin hökmü ilə Fəqanın cinayət təqibinə "Konstitusiya və Suverenlik ili" ilə bağlı amnistiya qərarı əsasında xitam verilib və o, cinayət məsuliyyətindən azad olunub.
