Son günlər müşahidə olunan intensiv yağıntılar Cəlilabad rayonunda çiyələk təsərrüfatlarına ciddi ziyan vurub.
Cenublu.az xəbər verir ki, xüsusilə açıq sahələrdə becərilən çiyələk plantasiyalarında məhsuldarlıq kəskin azalıb.
Fermerlərin sözlərinə görə, uzunmüddətli yağışlar və havanın yüksək rütubətli keçməsi nəticəsində sahələrdə müxtəlif göbələk xəstəlikləri yayılıb. Bu isə məhsulun keyfiyyətinə mənfi təsir göstərərək onun 50-60 faizinin yararsız hala düşməsinə səbəb olub.
Bildirilib ki, məhsul itkisi fermerlərin gəlirlərini əhəmiyyətli dərəcədə azaldıb, eyni zamanda istehsal xərclərini artırıb. Təsərrüfat sahibləri hava şəraitinin yaxın günlərdə stabilləşəcəyinə və məhsulu daha sərfəli qiymətə sata biləcəklərinə ümid edirlər.
Mütəxəssislər isə rütubətli hava şəraitində xəstəliklərin qarşısının alınması üçün aqrotexniki tədbirlərin vaxtında görülməsinin vacibliyini vurğulayırlar. Hazırda fermerlər qalan məhsulu qorumaq və itkiləri minimuma endirmək üçün mübarizə tədbirlərini davam etdirirlər.
