13-17 dekabr tarixlərində Lənkəran Olimpiya İdman Kompleksində Lənkəran-Astara Regional Gənclər və İdman İdarəsinin və Azərbaycan Boks Federasiyasının birgə təşkilatçılığı ilə Vətən müharibəsi şəhidi Baş leytenant Vüsal Kazımovun doğum gününə həsr olunmuş boks üzrə IV Lənkəran-Astara region turniri keçirilib.
Cenublu.az Lənkəran-Astara Regional Gənclər və İdman İdarəsinə istinadən xəbər verir ki, yarışda Lənkəran, Astara və Masallı rayonlarından olan 56 idmançı mübarizə aparıb və müxtəlif çəki üzrə yer tutmuş idmançılar diplom, medal və hədiyyələrlə təltif ediliblər.
Vüsal Kamran oğlu Kazımov Azərbaycan Respublikasının Prezidenti İlham Əliyevin Sərəncamlarına əsasən ölümündən sonra 3-cü dərəcəli "Vətənə xidmətə görə" ordeni, "Vətən uğrunda", "Xocavəndin azad olunmasına görə”, "Füzulinin azad olunmasına görə", "İgidliyə görə" medalları ilə təltif edilib.
Qeyd edək ki, Lənkəran Dövlət Universitetinin məzunu olan Vüsal Kazımov Lənkəran şəhər Uşaq-Gənclər İdman Məktəbinin direktoru vəzifəsində çalışıb.
