2025-2026-cı tədris ili üzrə Təhsil Tələbə Krediti (TTK) çərçivəsində ən çox maliyyə vəsaiti ayrılan 10 ixtisasın statistik göstəriciləri məlum olub.
Ən çox vəsait biznesin idarə edilməsi ixtisası üzrə ayrılıb. Belə ki, bu ixtisas üzrə 5 798 müqavilə bağlanıb, 3 050 tələbə təhsil tələbə kreditindən yararlanıb. Ayrılan ümumi vəsaitin məbləği 6 milyon 841 min 206,28 manat təşkil edib.
Siyahıda ikinci yerdə sosial iş ixtisası qərarlaşıb. Bu sahə üzrə 2 905 müqavilə bağlanıb, 1 277 tələbəyə ümumilikdə 2 milyon 679 min 97,15 manat kredit ayrılıb.
İlk üçlüyü Azərbaycan dili və ədəbiyyatı müəllimliyi ixtisası tamamlayıb. Bu ixtisas üzrə 2 935 müqavilə əsasında 1 084 tələbəyə 2 milyon 404 min 536,25 manat vəsait ayrılıb.
İqtisadiyyat ixtisası 2 milyon 166 min 440,60 manatla dördüncü, hüquqşünaslıq isə 2 milyon 95 min 877,33 manatla beşinci yerdə qərarlaşıb.
Reytinqin növbəti pillələrində ibtidai sinif müəllimliyi (1 milyon 996 min 481,50 manat), menecment (1 milyon 783 min 766,08 manat), marketinq (1 milyon 775 min 594,23 manat), maliyyə (1 milyon 593 min 474,42 manat) və tibb (1 milyon 592 min 432,75 manat) ixtisasları yer alıb.
Nəticə etibarilə 2025-2026-cı tədris ilində TTK vəsaitinin bölgüsündə biznesin idarə edilməsi ixtisası digər sahələri əhəmiyyətli fərqlə qabaqlayıb. İlk onluqda müəllimlik, iqtisadiyyat, hüquq, idarəetmə və tibb kimi müxtəlif istiqamətlərin təmsil olunması isə tələbələrin təhsil maliyyələşməsinə ehtiyacının fərqli ixtisas sahələrini əhatə etdiyini göstərir.
Mənbə: azedu.аz
