Lənkəran-Astara Regional Gənclər və İdman İdarəsinin əməkdaşları Lənkəran şəhər sağlamlıq imkanları məhdud uşaqlar üçün xüsusi internat məktəbinə baş çəkiblər. Bu haqda məlumatı Cenublu.az bu gün, 1 mart tarixində verir.
"İdman həftəsi" çərçivəsində keçirilən görüşdə, həmçinin idman ictimaiyyətinin nümayəndələri və könüllü gənclər iştirak ediblər. Onlar uşaqlar üçün gimnastika, şən startlar, minifutbol və voleybol oyunları təşkil ediblər.
Tədbirin keçirilməsində məqsəd bu kateqoriyadan olan şəxslərin cəmiyyətə inteqrasiyasının dəstəklənməsi, əlilliyi olan yeniyetmələrin fiziki fəallığı üçün bərabər imkanların yaradılması, eyni zamanda həyat keyfiyyətinin yaxşılaşdırılması və sosiallaşmasını təmin etməkdir.
İdman tədbirinə Beynəlxalq dərəcəli hakim, Əməkdar məşqçi Məmməd Məmmədov və Fəzail Əbilov rəhbərlik ediblər.
İnternat məktəbində Lənkəran, Astara, Lerik, Yardımlı, Masallı, Cəlilabad rayonlarından xüsusi qayğıya ehtiyacı olan uşaq və yeniyetmələr təhsil alırlar.
