Lənkəran-Boradigah magistral yolunun Lənkəranın Viravul kəndindən keçən hissəsində asfalt örtüyünün dağılması sürücülərin narazılığına səbəb olub.
Cenublu.az xəbər verir ki, yolun hərəkət hissəsində iri çalalar əmələ gəlib və bu, avtomobillər üçün ciddi təhlükə yaradır.
Xüsusilə Boradigah istiqamətində yolun sağ tərəfində yaranan çalalar qaranlıq düşdükdən sonra sürücülər üçün daha böyük riskə çevrilir. Çalaları vaxtında görməyən sürücülərin avtomobillərinə ziyan dəyir. Onlardan yayınmağa çalışanlar isə bəzən qarşı hərəkət zolağına çıxmağa məcbur olurlar ki, bu da qəza ehtimalını artırır.
Sürücülərin sözlərinə görə, sözügedən ərazidə dəfələrlə yol-nəqliyyat hadisələri baş verib. Onlar yolun yararsız vəziyyətinin aradan qaldırılmasını və təcili təmir işlərinin aparılmasını istəyirlər.
Məsələ ilə bağlı Azərbaycan Avtomobil Yolları Dövlət Agentliyinə sorğu ünvanlanılıb.
