Şirvan Apellyasiya Məhkəməsi ərini öldürməkdə təqsirləndirilən Kəsirə Cəfərovanın cəzasını 9 ildən 6 ilə endirib.
Hadisə 2025-ci il noyabrın 30-da Cəlilabad rayonunun Günəşli kəndində baş verib.
İttihama görə, üç uşaq anası olan Kəsirə Cəfərova səhər yeməyi zamanı həyat yoldaşı Vüsal Cəfərovla mübahisə edib. Qadın ifadəsində ailənin bütün yükünün onun üzərində olduğunu, ərinin maddi dəstək göstərmədiyini, spirtli içki qəbul edərək ona qarşı zorakılıq etdiyini bildirib. Hadisə günü də uşaqların dərmanları üçün pul istəsə də, həyat yoldaşından mənfi cavab alıb.
Məhkəmənin qənaətinə görə, uzun müddət davam edən ailədaxili gərginlik nəticəsində qadın kəskin psixi-emosional vəziyyətə düşüb. O, əlindəki mətbəx bıçağı ilə ərinin sinəsinə bir zərbə endirib. Vüsal Cəfərov aldığı xəsarətdən həyatını itirib.
Lənkəran Ağır Cinayətlər Məhkəməsi qadına 9 il həbs cəzası vermişdi. Lakin həm Kəsirə Cəfərova, həm də mərhumun anası apellyasiya şikayəti verərək əməlin daha yüngül maddə ilə tövsif edilməsini və qadının azadlığa buraxılmasını istəyiblər.
Apellyasiya məhkəməsi əməli "qəsdən adam öldürmə" maddəsindən "qəsdən sağlamlığa ağır zərər vurma, zərərçəkmişin ölümü ilə nəticələnmə" maddəsinə tövsif edib və cəzanı 6 ilə endirib.
Mənbə: pravda.аz
