Azərbaycan Basketbol Liqasında çempionatında əvəzləmə baş tutub.
Prosport.az xəbər verir ki, ötən il yaradılmış "Cəlilabad" komandası yeni mövsümdən "Quba" adı ilə çıxış edəcək. Həmin komandanın baş məşqçisi Şəhriyar Əsgərov və məşqçisi Zaur Paşayev "Quba"da fəaliyyətini davam etdirəcək.
Azərbaycan Basketbol Federasiyasının icraçı vitse-prezidenti Fərrux Mahmudov “Cəlilabad”ın “Quba” ilə əvəzlənməsinin səbəbini açıqlayıb. O, bildirib: "Ötən mövsüm Cəlilabadın komandası vardı. Azərbaycan Basketbol Federasiyasının bu idman növünün böyük şəhərlərdə təmsil olunması strategiyasına uyğun olaraq Cəlilabadı bu il Quba ilə əvəzlədik. Ötən mövsüm "NTD-İndiqo" komandası da Xaçmazı təmsil edirdi. Artıq Bakıda oynayacaqlar. Cəlilabad və Xaçmaz Olimpiya İdman Komplekslərində parket zallar vardı. Biz oranı təmir etmişdik deyə, komandalar orada oynaya bilirdi. Həm Lənkəran, həm də Quba Olimpiya İdman Kompleksində şərait daha yaxşıdır. Sadəcə, oradakı zallar betondandır. Artıq onlara da biz tərəfdən parket vurulur. Demək olar ki, Lənkəranda işlər yekunlaşıb, yalnız parketin laklanması qalıb. Daha sonra çempionata kimi Qubadakı işləri yekunlaşdırmağa çalışacağıq".
Qeyd edək ki, Azərbaycan Basketbol Liqasının yeni mövsümündə ilk dəfə 12 komanda mübarizə aparacaq.
