Bu gün Azərbaycan Silahlı Qüvvələrinin leytenantı, Lerik rayonundan olan Murtuz Çingiz oğlu Abbasovun doğum günüdür.
Murtuz Abbasov 1998-ci il noyabrın 2-də Lerik rayonunun Soru kəndində anadan olub.
Vətən müharibəsinin ilk günlərindən döyüşlərdə iştirak edən leytenant Abbasov, taqımı ilə birgə Cəbrayıl və Zəngilan istiqamətində gedən əməliyyatlarda, o cümlədən Azərbaycan–İran sərhədinin işğaldan azad olunmasında iştirak edib.
2020-ci il oktyabrın 22-də Zəngilan rayonunun Sığırt yüksəkliyi istiqamətində, Vejnəli qızıl mədəni yaxınlığında gedən döyüşdə bölüyü ilə düşmən pusqusuna düşüb. O, 6 döyüş yoldaşı ilə birlikdə düşmənlə mübarizəni üzərinə götürərək bölüyün qalan heyətinin təhlükəsiz çıxışına şərait yaradıb. Həmin döyüşdə 30 nəfər yaralanıb, leytenant Murtuz Abbasov isə 6 hərbi qulluqçu ilə birlikdə qəhrəmancasına şəhid olub.
III dərəcəli "Vətənə xidmətə görə" ordeni, "Vətən uğrunda" və "Zəngilanın azad olunmasına görə" medalları ilə təltif olunub.
2020-ci il oktyabrın 29-da Lerik rayonunun Soru kəndində dəfn edilib.
