Bu gün Lerikdən olan İman və Bəhrəm Məmmədzadə qardaşlarının anım günüdür.
İman Məmmədzadə 14 sentyabr 1998-ci ildə, Bəhrəm Məmmədzadə isə 18 aprel 2000-ci ildə Lerik rayonunun Kəlvəz kəndində anadan olublar. Ataları Elman Məmmədovun sözlərinə görə, İman və Bəhrəm uşaqlıqdan bir-birlərinə həm qardaş, həm də ən yaxın dost olublar. Onlar məktəbə də, idmana da həmişə birlikdə gediblər.
Vətən müharibəsi zamanı Xocavəndin Qırmızı Bazar istiqamətində gedən döyüşlərdə onların da olduğu 14 nəfərlik heyət düşmən pusqusuna düşüb. Həmin döyüşdə 11 hərbi qulluqçu şəhidlik zirvəsinə ucalıb.
İlk yaralanan İman olub. Bəhrəm dərhal "jgut" çıxararaq qardaşının ayağını bağlayıb. Daha sonra İman digər ayağından da yaralanıb. Bəhrəm qardaşının vəziyyətinin ağır olduğunu görərək özünü onun qarşısına atıb və snayper gülləsi ona dəyib. Qardaşlar qəhrəmancasına şəhid olublar.
İgid şəhidlərimiz 2 noyabr tarixində torpağa tapşırılıblar.
İman və Bəhrəm Məmmədzadə "Vətən uğrunda", "Xocavəndin azad olunmasına görə", "Cəbrayılın azad olunmasına görə", "Füzulinin azad olunmasına görə" medalları və 3-cü dərəcəli "Vətənə xidmətə görə" ordeni ilə təltif ediliblər.
