Cəlilabadda “Vətənin müdafiəsinə hazıram” poliatlon çoxnövçülüyü üzrə rayon turniri keçirilib. Bu haqda məlumatı Cenublu.az bu gün, 20 aprel tarixində verir.
Çağırışçı gənclər arasında keçirilən turnir Mərkəzi Stadionda baş tutub. Burada rayon üzrə gənclər və idman və təhsil sektorlarının əməkdaşları, rayonun 8 tam orta məktəbinin çağırışaqədərki hazırlıq hərbi rəhbərləri və komandaları olmaqla 40 nəfər iştirak edib.
Yarış 4 növçülük (100 metr məsafəyə qaçış, turnikdə dartınma, qumbara atma və 2000 metr məsafəyə qaçış) üzrə keçirilib.
Turnirdə Xəlilabad kənd tam orta məktəbinin komandası I yerə, Ocaqlı kənd 1 nömrəli tam orta məktəbinin komandası II yerə, Cəlilabad şəhər 1 nömrəli məktəb-liseyin komandası III yerə layiq görülüb. Qalib komandalara diplomlar təqdim olunub.
Rayon turnirinin qalibi olan Xəlilabad kənd tam orta məktəbinin komandası zona mərhələsinə vəsiqə qazanıb.
Tədbir Lənkəran–Astara Regional Gənclər və İdman İdarəsinin təşkilatçılığı ilə həyata keçirilib.
