“Cəlilabad” klubunun baş məşqçisi Şəhriyar Əsgərov Azərbaycan Basketbol Liqasının XI turunda “Neftçi”yə 63:72 hesablı məğlubiyyətin səbəbini açıqlayıb. Bu haqda məlumatı Cenublu.az bu gün, 19 yanvar tarixində Report.az-a istinadən verir.
Mütəxəssis bunu heyətdəki zədəlilərin çoxluğu ilə əlaqələndirib: “Neftçi”yə qarşı xüsusi planlarımız var idi. Əsasən, rəqibin mərkəz oyunçusunu bağlamağa çalışırdıq. Heyətimiz tam deyildi, itkilərimiz var idi. Seyidhüseyn Eynullayev və Kobi Tomasın zədələrinin üstünə ikinci hissə başlayan kimi Camani Pirsin zədəsi də gəldi. Camani ən güclü oyunçularımızdan biridir. Matçı onsuz davam etdirmək bizə əlavə çətinlik yaratdı və bu itkilərin nəticəsində dördüncü periodda fiziki cəhətdən çatdırmadıq. Yekunda məğlub olduq”.
Qeyd edək ki, “Cəlilabad” hazırda 15 xalla turnir cədvəlinin 6-cı pilləsində qərarlaşıb.
