Lənkəranda keçirilmiş “Zəfər Qaçışı" devizi altında region qaçışında Astaranı təmsil edən idmançılar yüksək nəticələr ilə yadda qalıblar.
Cenublu.az xəbər verir ki, Lənkəran-Astara Regional Gənclər və İdman İdarəsinin təşkilatçılığı ilə keçirilən kütləvi qaçışda Astara, Lənkəran, Masallı, Cəlilabad, Lerik və Yardımlı rayonlarını təmsil edən 200-dən artıq 14 yaşdan yuxarı gənc idmançı iştirak edib.
Belə ki, Azərbaycan Atletika Federasiyasının Astara rayonu üzrə məşqçisi, Astara şəhər 3 saylı tam orta məktəbin fiziki tərbiyə müəllimi, atletika üzrə 5 qat Azərbaycan çempionu Rəşad Əliyevin rəhbərliyi ilə hazırlanmış Astara idmançılarından Cəfərov Nabil (I yer) və Həsənli Elxan (III yer) fəxri kürsüyə yüksəlməyi bacarıblar. Digər 3 idmançı - Qulamov Yusif (İV yer), Novruzov Anar (V yer), Ağayev Şöhüb (VI yer) ilk onluqda qərarlaşıblar.
Region qaçışında uğur qazanan idmançılar Lənkəran-Astara Regional Gənclər və İdman İdarəsinin diplom və medallarına layiq görülüblər.
