Astarada Aprel döyüşlərinin qəhrəmanı şəhid Pəncəli Teymurovun xatirəsinə həsr olunmuş şahmat turniri baş tutub. Bu haqda məlumatı Cenublu.az bu gün, 19 aprel tarixində verir.
Yarış Rayon Uşaq-Gənclər İdman-Şahmat Məktəbində keçirilib. Burada 16 məktəb komandasını təmsil edən 48 nəfər məktəbli şahmatçı (16 qız və 32 oğlan) mübarizə aparıb.
Turnirdə I yerə Mirzə Ələkbər Sabir adına Astara şəhər 1 saylı tam orta məktəb, II yerə Astara rayon UGİŞM-1, III yerə Ziya Bünyadov adına Astara şəhər 2 saylı tam orta məktəb komandaları layiq görülüblər.
Sonda fəxri yerləri qazanan şahmatçılara diplom və medallar təqdim edilib.
Turnir Lənkəran–Astara Regional Gənclər və İdman İdarəsinin təşkilatçılığı ilə həyata keçirilib. Yarışın baş hakimi Beynəlxalq dərəcəli hakim, rayon Uşaq-Gənclər İdman-Şahmat Məktəbinin direktoru Azər İbrahimov olub.
