Astarada 3x3 basketbol üzrə məktəbli oğlanlar arasında rayon turniri keçirilib. Bu haqda məlumatı Cenublu.az bu gün, 26 yanvar tarixində verir.
8 məktəb komandasının Olimpiya sistemi ilə mübarizəsi şəraitində keçən yarışda I yerə O.Yəhyayev adına Şiyəkaran kənd 2 nömrəli tam orta məktəbi, II yerə R.Mirzəyev adına Şahağacı kənd 1 nömrəli tam orta məktəbi, III yerə isə C.Cabarlı adına Kakalos kənd tam orta məktəbinin komandaları layiq görülüb.
Yarışın baş hakimi Beynəlxalq dərəcəli hakim, “Azərbaycan Respublikasının Fəxri Bədən Tərbiyəsi və İdman işçisi”, Z.Bünyadov adına Astara şəhər 2 nömrəli məktəbinin fiziki tərbiyə müəllimi Afət Əkbərov olub.
Qalib komandaya Lənkəran-Astara Regional Gənclər və İdman İdarəsinin kuboku, fəxri yerləri qazanan komandaların üzvlərinə isə idarənin diplomları təqdim olunub.
Qeyd edək ki, turnir R.Camalov adına Astara şəhər 7 saylı tam orta məktəbində Lənkəran-Astara Regional Gənclər və İdman İdarəsinin Astara rayonu üzrə gənclər və idman sektorunun, Lənkəran-Astara Regional Təhsil İdarəsinin Astara rayonu üzrə sektorunun birgə təşkilatçılığı ilə baş tutub.
