Azərbaycanın Milli Qəhrəmanı, Aprel döyüşlərinin şəhidi - polkovnik-leytenant Murad Mirzəyevin oğlu Nurlan Mirzəzadə dünyanın 3 nüfuzlu universitetinə qəbul olub.
Nurlan "Corvinus University of Budapest", "Eötvös Loránd University" və "Royal Holloway, University of London" universitetlərindən qəbul alaraq böyük uğura imza atıb.
Murad Mirzəyev xidmət etdiyi illərdə Azərbaycan Silahlı Qüvvələrinin ən peşəkar və yüksək hazırlıqlı zabitlərindən biri kimi qiymətləndirilib.
Murad Mirzəyev 1976-cı il martın 31-də Sabirabad rayonunun Muğangəncəli kəndində dünyaya göz açıb.
O, 2 dəfə "Qüsursuz xidmətlərə görə", "Hərbi xidmətdə fərqlənməyə görə" medalları və 3 dəfə "Azərbaycan Respublikası Silahlı Qüvvələrinin yubiley medalı", eyni zamanda dəfələrlə qiymətli hədiyyələrlə mükafatlandırılıb.
Murad Mirzəyev 2016-cı ildəki aprel döyüşlərində ermənilərin təxribatına qarşı cəsarətli addımlar atıb. O, 2016-cı il aprelin 2-də komandiri olduğu qrupla birlikdə yüzlərlə ermənini Talış kəndi ətrafında məhv edib, qeyri-bərabər döyüşdə tutduğu mövqedə düşmən gülləsinə tuş gələrək şəhid olub və Bakıdakı İkinci Fəxri Xiyabanda dəfn olunub.
O, "Azərbaycan Milli Qəhrəmanı" fəxri adına layiq görülüb.
