Cəlilabad rayonunun Cəfərxanlı kəndi ərazisində yerləşən Paşatəpə adlı qədim yaşayış məskənində aparılan arxeoloji qazıntılar zamanı yeni dulusçuluq məhəlləsi tapılıb.
Cenublu.az xəbər verir ki, qazıntılar AMEA-nın Arxeologiya və Antropologiya İnstitutunun baş elmi işçisi, Muğan Neolit–Eneolit ekspedisiyasının rəhbəri, tarix elmləri doktoru Vəfa Mahmudovanın rəhbərliyi ilə həyata keçirilir.
Vəfa Mahmudovanın sözlərinə görə, 9 min il əvvələ aid edilən bu qədim yaşayış məskəni Azərbaycanın erkən dulusçuluq mədəniyyətinin öyrənilməsi baxımından mühüm əhəmiyyət daşıyır. Tədqiqatlar zamanı burada dulusçuluq fəaliyyətinə dair izlər – saxsı qurutmaq üçün tumba, divar qalıqları və müxtəlif təyinatlı artefaktlar aşkar olunub. Onların arasında təyinatı hələ müəyyən edilməmiş bir neçə qiymətli əşya da var.
Qeyd edək ki, bundan əvvəl də Paşatəpədə neolit dövrünə aid saxsı, sümük və dəvəgözü daşından hazırlanmış məişət və bəzək əşyaları, eləcə də Azərbaycanın arxeoloji tarixində ikinci at əhliləşdirilməsi nümunəsi aşkarlanmışdı.
Paşatəpə abidəsi alimlər tərəfindən ilk dəfə 1970-ci illərdə qeydə alınıb. İndiyədək aparılan qazıntılar bu ərazinin qədim insan məskəni kimi böyük tarixi əhəmiyyətə malik olduğunu bir daha sübut edir.
