Bu gün sənətkarlıq həyatına Üzeyir Hacıbəylinin təklifi ilə başlayan Gülağa Məmmədovun xatirəsi anılır.
Gülağa Allahverdi oğlu Məmmədov 28 iyun 1925-ci ildə Lənkəran şəhərində anadan olub.
O, maddi vəziyyətə görə ailəsi ilə birgə Bakıya köçüb. Gülağa 1943-cü ildə Bakıda 132 saylı orta məktəbi bitirib.
O, kiçik yaşlarından musiqiyə maraq göstərib. Bir gün 12 yaşlı Gülağa qonşu uşaqları başına yığıb mahnı oxuduğu zaman təsadüfən həmin küçədən keçən bəstəkar Üzeyir Hacıbəyli onun səsini eşidib. Bu hadisədən sonra o, Üzeyir bəyin təklifi ilə 1938-ci ildə Moskvada Azərbaycan mədəniyyəti ongünlüyünün iştirakçısı olub. Gülağa burada maestro Niyazinin müşayiəti ilə “Koroğlu” operasından “Səni gördüm, aşiq oldum” ariyasını ifa edib. O, gümüş medala və fəxri fərmana layiq görülüb. Moskvadan qayıdandan sonra bu uğurlarına görə ona ikiotaqlı ev və aylıq təqaüd ayrılıb. Sənətkar Azərbaycan musiqisini Polşa, Almaniya, Türkiyə, Əlcəzair və s. ölkələrdə təbliğ edib.
Gülağa 15 yaşında olarkən bəstəkar Səid Rüstəmovun ansamblına qəbul edilib. Daha sonra o, Konservatoriyaya (indiki Bakı Musiqi Akademiyası) daxil olub. Burada Gülağa sənətkar Bülbüldən dərs alıb.
Məmmədov 1947-1949-cu illərdə Musiqili Komediya Teatrında çalışıb. Burada o, “Arşın mal alan”, “Beşmanatlıq gəlin” və digər tamaşalarda baş rollarda çıxış edib.
Sənətkar bütün yaradıcılığı boyu 600-dən çox mahnı oxuyub, 15-dən çox bədii filmdə və teatr tamaşalarında mahnılar səsləndirib.
1952-ci ildən ömrünün sonunadək Gülağa Azərbaycan Dövlət Televiziya və Radio Verilişləri Komitəsinin xalq çalğı alətləri ansamblının solisti olub.
Gülağa Məmmədov 7 iyun 1994-cü ildə Bakıda infarktdan vəfat edib.
