Lənkəran şəhərinin Şeyx Zahid küçəsində yaşayanlar suötürücü bərələrin uzun müddətdir təmizlənmədiyini bildirirlər.
Cenublu.az xəbər verir ki, suötürücü bərələrdə lil, palçıq və müxtəlif məişət tullantılarının yığılması ərazidə ciddi antisanitar vəziyyət yaradıb.
Sakinlərin sözlərinə görə, xəndəklərin ot basması və kanalların tutulması suyun normal axınına mane olur. Nəticədə bəzi hissələrdə su yığılması müşahidə edilir. Yay aylarında isə vəziyyət daha da ağırlaşır. Ərazidə yayılan üfunət səbəbindən həyətlərdə oturmaq, hətta evlərin pəncərələrini açmaq mümkünsüzə çevrilir.
Sakinlər aidiyyəti qurumlardan suötürücü kanalların təmizlənməsini və yaranmış antisanitar vəziyyətin aradan qaldırılmasını xahiş edirlər.
