Lənkəranlı gənc alim Əbülfəz Hacızadə təhsil və karyera uğurları ilə diqqət çəkir. ABŞ-də bakalavr, magistr və doktorantura təhsili alan həmyerlimiz hazırda dünyanın aparıcı texnologiya şirkətlərindən biri olan Google-da çalışır.
1995-ci ildə Lənkəranın Kərgəlan kəndində anadan olan Əbülfəz Hacızadə orta təhsilini Lənkəran Türk Liseyində alıb. Onun beynəlxalq təhsil yolu 2011-ci ildə Benjamin Franklin proqramı çərçivəsində ABŞ-yə səfəri ilə başlayıb. Daha sonra FLEX mübadilə proqramını qazanaraq ABŞ-də orta məktəbin son sinfində təhsilini davam etdirib.
Ə.Hacızadə 2018-ci ildə ABŞ-nin Delta Dövlət Universitetində Kompüter İnformasiya Sistemləri ixtisası üzrə bakalavr təhsilini başa vurub. O, 2020-2022-ci illərdə Corciya Texnologiya İnstitutunda Kompüter Elmləri üzrə magistr dərəcəsi əldə edib. Təhsilini daha da inkişaf etdirən gənc alim 2022-2025-ci illərdə Tulsa Universitetində İnformasiya Təhlükəsizliyi üzrə doktorantura pilləsində oxuyub.
Akademik fəaliyyəti ilə yanaşı, o, bir müddət ABŞ-də özəl orta məktəblərdən birində müəllim kimi çalışaraq VII-XI sinif şagirdlərinə texnologiya fənnini tədris edib.
Hazırda Əbülfəz Hacızadə Google şirkətində Maşın Öyrənməsi üzrə Proqram Mühəndisi (Software Engineer – Machine Learning) vəzifəsində fəaliyyət göstərir.
