Lənkəran şəhərində yerləşən və "Kiçik Bazar" qəbiristanlığı kimi tanınan ərazidə yaranan antisanitar vəziyyət sakinlərin narazılığına səbəb olub.
Cenublu.az xəbər verir ki, qəbiristanlığın müxtəlif hissələrində plastik su butulkaları, solmuş gül dəstələri, məzar təmiri zamanı istifadə olunan sement kisələri və digər məişət tullantıları qalaqlanıb. Zibilin vaxtında yığışdırılmaması ərazidə baxımsız və antisanitar vəziyyət yaradıb.
Sakinlərin sözlərinə görə, bəzi şəxslər tullantıları müəyyən olunmuş yerlərə deyil, qəbiristanlığın müxtəlif nöqtələrinə atırlar. Bu isə həm ərazinin görünüşünü korlayır, həm də müqəddəs məkana hörmətsizlik kimi qiymətləndirilir.
Qəbiristanlığa yaxınlarının məzarını ziyarət etməyə gələn sakinlər aidiyyəti qurumları ərazidə təcili təmizlik işləri aparmağa və burada mütəmadi olaraq sanitar tədbirlərin görülməsini təmin etməyə çağırırlar. Onların fikrincə, belə bir məkanın baxımsız vəziyyətdə qalması qəbuledilməzdir.
